Laif-Uffnaame gits naduurgemäss kaini aber mit hänn d Värs trotzdäm yygsunge
aifach under em Bangg uffs Dreiegg gligge und mer föön aa singe, falls es e Uffnaam git.
Stacks Image 1512
Das hailig Joor goot z Änd, drum schliesst symbolisch
dr Papscht am Petersdom das Dürli zue.
Ass jeede merggt - ebb Chrischt oder katholisch -
Dr Vati-kann-nicht mehr, är bruucht sy Rueh.
"S wird Zyt ass me die Löcher schliesst" hett gescht e Nunzius gsait,
"esoo vyl Frischluft hett dr Vatikan no nie verdrait."
Stacks Image 1528
Jetz könne d Fast-Food-Gaschtronoome joole,
vom Badische- bis Bahnhof SBB.
All 100 Schritt Brioone-Börger hoole,
bim Roothuus gitts jetz ai MacDonalds meh.
Do maint dr neu Tourismusscheff: "Tüend doch nööd so blööd;
as Zürcher stöört miich da dernäbed s Raaathuus würckli nööd!"
Stacks Image 1544
Mir glaubes kuum: jetz haisst doch Züri-Kloote
"Züri-Unique; was mien die döört esoo
verbisse Änglisch schnuure wie d Piloote,
für uns haisst sälle Hafe "Züri-Klo".
In Däuntäun-Switzerländ hett doch dr Gröösewaan sy Näscht,
s goot nümme lang no nenne die Europa "Züri Räscht".
Stacks Image 1576
Hesch Du e scharf dressierte Pudel, Alte?
Denn bruuchsch noo Gsetz e Waffeschyyn dehaim.
Sogar die griene Hünd mien sich draa halte,
nadüürlig hett dr Baskerville doo ain.
Dr Blocher wo au kläfft und bällt und gaiferet wie kaine
sott sträng gnoo au e Muulkorb haa - und nit e z langi Laine.
Stacks Image 1592
Wie schmeggt äggscht au dä US-Ämmidaaler
mit gnormte 1-Zoll-Löcher (ohni Kääs)?
Mit Ainhaitslöcher isch är no banaler,
und schmeggt är nit noo nüt no isch er z rääss.
Mir hänn z Nu-Yorgg e Schyybe Kääs brobiert, ebb är dät munde;
lang kätscht - und denn dr Blastigg-Hotel-Zimmerbass nümm gfunde.
Stacks Image 1608
Mr mien im Vischer schwäär an Kaare faare:
Dr Laischtigsloon bim Staat isch höggscht gemein.
Parkiersch nur aimool lätz no hesch am Kaare
grad 50 Buessezeedel, nit nur ain.
Und stell Dr eerscht das Bauloch vor, vom Gellert bis uff Rieche,
wos gääb wenn alli die vom Baudepp ändlig öbbis mieche.
Stacks Image 1624
"Hai mir das Gryffemööhli z Basel gnosse",
sait d Lieschtlemer Regierig, sichtlig griehrt;
"Grad hai mir uff dr Hülfteschanz no gschosse,
und scho hai d Stedter öis es Znacht spändiert!
Hejoo dernoo, äs hett öis gschmeckt, doch isch s dr grösser Hit,
dass die 3E jetzt au entdeckt hai dass es Fraue gitt!"
Stacks Image 1640
Hänn Si d Regierigswaahle so erwartet?
Sinn Si politisch luggeloos im Bild?
Dää Eymaa isch mit 100 sänggrächt gstartet,
das freut dr Vischer, Conti und dr Schild.
Im Freysinn freut sich kai Maa, und e mängge sait ihm stinggs:
sr Eymaa syg im ghaima (dängg) e Ghaimagänt vo linggs!
Stacks Image 1656
Toyota zaalt im FCB Milljoone,
für Judo, Jiu Jitsu, s isch famos.
Dr Ceccaroni maint, es däät sich loone,
de riefsch "Banzai ! und goosch uff d Balle loos.
"Syt mir unsri Karatekünscht dääwääg dien entfalte,
dien ir pro Spiil - im Minimum - 15 Balle spalte!"
Stacks Image 1672
Wo mir d Parsenn ab schwinge, noo de Viere,
doo haltet ys e Schugger-Rambo aa:
"Wänn Dir 4 uff Davos go randaliere?"
froggt dää im Winter-Vierfrucht-Pyjama.
Bim Grüzzverhöör dien die dernoo vo Wältverschwörig lalle,
jetz waisch: die Schwyzer Bulle sinn vom Rinderwaan befalle.
Stacks Image 3835
Wo me s Genom vom Bebbi duet zerleege,
entdeggt me völlig neui Basler Gen.
S duet s Gugge-Gen s Glaibasler Gmiet erreege,
dr Daigaff kultiviert sy GGGen.
Dr Haiggi haigi gar kai Gen, är isch drotzdämm e schygge
und syt Geburt - naduurgemääss - in dr Sans-Gen(e)-Clique.
Stacks Image 3867
Das öschterrychisch Säuli isch dernääbe,
isch gschprützt und gimpft und dopt bis unters Dach.
Es griegt kai Grangget in sym kurze Lääbe,
isch voll Hormoon und gaischtig zimmlig schwach.
Won är das höört doo maint dr Alex Zülle ze der Züllere:
"Statt Doping duen ych numme no Süüli-Gülle güllere!"